Khutbah Sunda : Tilu Cocoba
Khutbah Jum’at Bahasa Sunda Tentang Tiga Ujian
“Kukituna aranjeun kudu iman ka Alloh katut Rosul-Na jeung kana cahaya {Qur’an} anu ku Kami diturunkeun. Jeung Alloh uninga kana saniskara anu ku aranjeun dilampahkeun” {Q.S. At – Taghobuun, ayat 8}
TILU COCOBA
Hadirin Ahli Jum’ah, Rohimakumulloh !
Hayu urang sami – sami ningkatkeun kataqwaan ka Alloh SWT, ti ayeuna ka payun niatan ningkatkeun atanapi niat seja bade ngomean diri. Nu tadina hoream sholat berjamaah nu lima waktu, maksakeun bade berjamaah jeung sholat sunat rowatibna. Nu tadina resep kana perkara anu haram, maksakeun ngalesotkeun anu haram. Nu tadina tara kersa ngaderes Al – Qur’an, wiridan ba’da sholat, maksakeun wiridan heula. Nu tadina ngedul nyuprih elmu babandung kuping, maksakeun daek ngaji. Magi niyat kana hade dicatet ku Gusti Alloh, upami prak dilakonan dua kali ganjaranna, ku niyatna kenging ganjaran jeung ku prakna kenging ganjaran. Dina raraga ningkatkeun kataqwaan niyat ngomean diri.
Umur nambahan hakekatna beuki caket nyampeurkeun kana kuburan, umur beki seep, piraku kalakuan teu beuki sae, komo mun beuki rajet. Cenah aya kahayang kana ngalakukeun goreng, wajar da aya iblis jeung hawa nafsu pikeun nguji kuat jeung henteuna kaimanan jeung kataqwaan, tapi aya senajata sakti di manusa nyaeta akal jang ngalawanna. Nafsu nu matak kaduhung, badan anu katempuhan. Lawan, hancurkeun batil, hancurkeun ma’siyat, niyat bade taat, buleudkeun dina hate.
Hadiri Rohimakumulloh !
Kanjeng Nabi Muhammad SAW parantos ngadawuh
“Aranjeun kudu campur gaul jeung para ulama jeung ngupingkeun cariosan ahli hukama ahli elmu, margi Alloh Ta’ala bakal ngahirupkeun hate nu paeh ku elmu nu manfaat, saperti ngahirupkeunna Gusti Alloh jagat nu halodo kahujanan” { Nashoihul ‘Ibad, kaca 4 }
Wajar, jalmi beuki anggang ti ulama beuki teuas hatena, beuki lemah imanna, beuki ruksak ucap paripolahna. Pidawuh Nabi SAW dina hadis sanesna :
“Engke bakal datang hiji zaman ka ummat Kami, muslimin jauh ti ulama, Maka Alloh bakal nibakeun ka muslimin ku tilu cocoba”
Kahiji Alloh nyabut berkah ladang usaha maranehna. Rajeun hasil tina usahana tapi ladangna diangge gawe doraka, diangge ngadu, lacur, mabok, poya – poya nganteur kahayang nafsu syahwat. Ngabalanjakeunna teu jadi ibadah, teu jadi sabab jang kakuatan ibadah. Atawa ngupingkeun papatah para hukama atanapi teu nurut kana papatahna.
Bahaya anggang ti ulama nu kadua :
Muslimin dikawasa, ditandasa ku nu dzolim. Muslimin dilunjak dicomot ku nu dzolim margi apaleun muslimin lemah teu aya kakuatan, teu aya tulangan, teu aya sihungan, teu aya cucukan margi anggang ti ulama. Muslimin jadi panitahan batur, jadi jongos batur. Muslimin hirupna dialas diatur ku maranehna, mun ge babarengan hirup pipilueun dina haram jeung ma’syiat.
Tindakan terakhir ti Gusti Alloh akibat muslimin anggang ti ulama, anti kana ngaji, sahingga bodo tina elmu agama, teu apal prak-prakana ibadah, tekadna mengpar tina akidah ahli sunnah wal jamaah, maka dawuh Rosul SAW musibah terakhir maot teu nyandak iman, mulang ka Alloh teu nyandak iman. {Nashoihul’Ibad, kaca 4}
Usaha tik-tik brek, hirup didolim dikawasa ku batur, ari maot teu nyandak iman, nu kitu ngarana jalma sangsara dunya cilaka akherat !. Na’uzdubillahi min zdalik.
Muga – muga urang sadaya ku Gusti Alloh ditebihkeun tina nandangan tilu cocoba nu bieu ku wasilah hirup caket ka para ulama sareng hukama ! Aamiin
0 Response to "Khutbah Sunda : Tilu Cocoba"
Post a Comment
Silahkan berkomentar dengan baik dan sopan, bila ada kesulitan silahkan bertanya